السلام عليكم ورحمه الله وبركاته
دواجن سليمان يقوم لكم الجديد
أخي الفلاح أختي الفلاحة .....
اليوم غانتكلم لكم على مشروع فلاحي صغير لي يقدر يديرو أي فلاح مبتدئ برأس مال صغير و طبعا هذا المشروع قابل يتطور مع المدة
المشروع لي غانتكلموا عليه هوا .. إنتاج البيض البلدي ...
كلنا كانعرفوا أن البيض البلدي فالبلادنا عليه طلب و طلب كبييييير بزاف و بعبارة أخرى لي انتجتيها تقدر تبيعها بسرعة، بالإضافة لسهولة تربية الدجاج البلدي لأن مناعتوا قوية و قادر يصبر على بزاااف ديال الضروف، خوتي حنا كانتكلمو على مشروع ساااهل و مربح و أكيد فيه سلبيات و لكن غانوضعوا لهم حد
قبل ما نبداو فالتفسير غانحاولو نقسموا الموضوع ديالنا لمجموعة من العوارض لي غانجاوبو فيها على بعض الاسئلة لي رآها دابا كادور فبالكم. .
-إلا كان هاذ المشروع مربح و ساهل لهاذ الدرجة علاش ماكينينش مستتمرين كبار فهاذ المشروع ؟؟
-شنو هما الحوايج لي خاص يتوفرو عندي باش نقدر نبدى هاذ المشروع ؟؟
-شنو هما الحوابج لي خاص يتوفروا فيا كمربي دواجن ؟؟
-كفاش نقدر نشري الفلوس و منين ؟؟
-الا بغيت نخرج الفلوس راسي كفاش نشري فقاسة و منين و شحال الأثمنة ديالها ؟؟
-كفاش غانربي الفلوس حتال مرحلة الانتاج ؟؟
-شحال غايخلي ليا المشروع ديال الربح ؟؟
-شنو هوما الحوايج لي نخاف منهوم و كفاش نتفاداهوم ؟؟
-كفاش غانقدر نبيع المنتوج ديالي بعدما بديت الإنتاج ؟؟
-من الناحية القانونية اشمن اطار قانوني نقدر نخدم فيه ؟؟
بسم الله توكلنا على الله، فالبداية الاخوان هاذ الشرح ماهوا إلا تفسير بسيط لأن كل سؤال من هاذ العشر أسئلة فيه مجموعة كبييييرة من الأسئلة الأخرى. لكن الاهم دبا نعطيو صورة عامة على المشروع و لي بغا يدخل للتفاصيل يتواصل معاي و نشارك معاه جميع المعلومات و التجارب.
1- المشروع ديالنا هو بالفعل مربح و ساهل بزاااف لكن لي خلا المستثمرين مايدخلوش ليه هو أننا فالمغرب ماعندناش سلالة وحدة فالدجاج البلدي، بالتالي البيض كايكون كايختالف فالقيمة الغذائية و الخصائص ديالو من بيضة لبيضة و حتى من فالمناعة و الامراض البلدي كايختالف من دجاجة لأخرى.
فالشركات الكبار ملي كيديو شي دجاجة للمختبر و يدرسوها النتائج لي كاتعطيهوم مايمكنش تكون كاتمثل القطيع كامل و مايمكنش أيضا ياخذو كل دجاجة بوحدها،
و هذا هو المشكل لي كايمنعهوم ايستثمروا فالبلدي، و لكن مؤخرا بداو كايظهرو فلاحين شباب كايخدمو على هاذ المشروع بقوة و قدرو يحققو فيه دواتهوم و نجحو بامتياز. لأنهم عارفو السر و درسو مشاريعهم كما ينبغي.
2- المشروع ديالنا كيف جميع المشاريع بغا مجموعة من الأشياء باش نقدرو نقولو باسم الله...
(الارقام و الأثمنة المدكورة هي تقريبيا للمشروع 1000 دجاجة)*
... خاصنا أرض لا تقل عن 1000 متر مربع غانخصصو منها 200 تال 300 متر مربع للعنبر "الكوري" و الباقي للرعي لأننا كانتكلمو على الدجاج البلدي و الا مكانش كايرعى راه مابقاش بلدي، ( البناء بصفة عامة كانقدرو لو ميزانبة ديال 2 مليون سنتيم )
...
خاصنا هاذ الكوري يكون مبني بطريقة اخترافية العلو لا يقل على 3 متر النوافذ متقابلة و فبها شباك كابمنع الطيور البرية من الدخول و الطول على اتجاه الرياح و الارضية مسلسة لتسهيل التنظيف و يترش الكوري بالكامل بالجير ...
... خاصنا مستودع ملابس و دوش من اجل حماية القاطيع ديالنا لازم ناخذو دواش كل يوم قبل ماندخلو للكوري ...
خاصنا غرفة العلف و غرفة فين نحطو الانتاج ديالنا و انظفوه و نحيدو لي ماصالحاش و نقادو لومبالاج ديالنا
...المساحة ديال الرعي ديالنا تكون محاطة بصور او بسياج لي يمنع دخول الحيوانات و تكون مسقفة بشبكة تفاديا لدخول الطيور البرية الحاملة للأمراض، و فحالة استعصى علينا أمر السقف نحاولو مانحطوش الطعام و الماء فالخارج باش مايتشاركوش الطيور الطعام مع القطيع ديالنا ...
ثم غايخصونا مجموعة من الماطربال الضروربة فالتربية بحال العلافات و الشربات مقياس الحرارة و السخان ديال البوطة (جميع الماطريال كانقدرو لهوم ميزانية ديال 2000 درهم)...
غايخصنا العلف الكافي لمدة 21 يوم، العلف ديال الديماراج معروف عند بائعي العلف بالاضافة لبعض التلاقيح. ( غنخصصو لهم ميزانية 2000 درهم )
... ثم أخيرا غايخصنا 1000 كتكوت بلدي عمر يوم ( 7000 درهم)
إلا وفرنا هاذ الأمور كلها غانكونوا قادرين نبداو مشروع ديالنا .. و الا جمعنا هاذ الارقام غانحصلو على رأس المال التابث لي هوا تقريبا 31000 درهم في حالة وجود الأرض .....
3- أنا كافلاح فالبداية لابذ يكون عندي الصبر و الا زرعت نخدم و نكافح و نصبر على العام باش نجني الغلة ديالي و لأننا فمشروع عندو علاقة بالفلاحة فضروري كمربي دجاج نصبر و نخدم و نكافح باش نجني ماخصنيش نفكر فالربح من البداية خاصني نصبر و مشروع الدجاج راه باغي سنة الى سنتين باش نقدر نبدا نربح و لكن بعدها كلو ربح و نجاح و حصاد لداكشي لي صهرنا عليه سنتين كاملة....
4-الفلوس غانقدر نشريه من عند فلاحين كايكونوا خدامين على هاذ المشروع ديال انتاج الفلوس و فالشرى ديال الفلوس نراعيو شي مسائل بحال المرض و واش بلدي او كروازي و العمر نقدرو نعرفوه مامريضش بالحركة و النشاط و نميزوه بلدي باللون لان الكروازي لونين فقط الاحمر و الاخر ابيض و اسود لي سميتو حجر الواد و افضل حاجة الواحد يشري من عند تعاونية باش يضمن جودة المنتوج....
5- نقدر نشري فقاصة و نخرج الفلوس راسي بأقل ثمن و نربح فقاصة لي بحد داتها مشروع نتكلمو عليه فمقال اخر ان شاء الله لكن بعجالة الا بغيت نشري فقاسة خاصني نكون عارف شي امور مهمة .. لي هيا واش الفقاسة اوتوماتيك او مانييل شنو هما الالات لي كاتخدم بيها و الثمن ديالها .. على العموم الفقاسة اوتوماتيك هيا افضل حاجة بلا مانضيعو فلوسنا فحاجة اخرى مهما كان ثمن ناقص .. الثمن ديال فقاسة 1000 بيضة كادير مابين 7000 تال 9000 درهم و صنع محلي و كانصحكم بصنع محلي أفضل حاجة لأنو قابل للاصلاح الا وقع شي مشكل كايتصلح بسهولة أما ديال برى الا خسرات لوحها و الثمن ديالها خيالي .. 1000 بيضة 2 مليون لفوق....
6- بعدما وجدنا الكوري و شرينا او فقسنا الفلوس .. خاصنا نعرفو شنوهما المراحل لي كايمر منها الفلوس و كفاش نتعاملو معاه فكل مرحلة .. اول مرحلة هيا مرحلة الديماراج من اول يوم تال 21 يوم و هي المرحلة الحساسة نوع دالعلف لي كانستعملو فيها هو علف ديماراج لي معروف عند جميع الموزعين، ...
كانفرقو العلف على زوج وجبات فالفحر و فالعصر كاحسن فوقت نقدمو فيه العلف للقطيع ديالنا، بالنسبة الماء شيحاجة لي ضروري تبقى متوفرة عندهوم 24 ساعة على 24، كذلك فهاذ الفترة ضروري من السخان ديال البوطة و بالخصوص ففصل الشتاء لان البرد خطير على الفلوس فهاذ العمر. ثم غايخصنا مجموعة من التلاقيح لي كادار فأيام خاصة من الافضل تبع مع بيطري لي يوريك بالتطبيق كفاش تقدم التلقيح للقطيع ديالك... بعدما كاتمر فترة الديماراج غاندخلو لمرحلة النمو لي غادوم 7 اشهر باش يبدى لينا انتاح البيض .. فهاذ المرحلة كانقدمو علف الدوزيام....
و بعض التلاقيح لي كانسميوها تدكير التلقيح .. على العموم هاذ المرحلة كاتكون أقل خطورة من الديمراج وملي كاتسالي كاندخلو لمرحلة الانتاج 7 شهور و ما فوق هنا غانخرجو الفروج نبيعوه و نخليو فقط الدجاجات و غانوليو نعطيو علف البياضة و غانستامرو بيه طيلة عمر الانتاج..
7- بالنسبة للربح بالدراسات و التجارب توصلنا اننا كانصرفوا تقريبا 0،5 درهم على الدجاجة فاليوم باش تعطينا بيضة فيومين بثمن 1،5 درهم يعني غانربحو 0،5 درهم فاليومين عن كل دجاجة يعني 0،25 درهم فاليوم اي الا عندنا 1000 دجاجة غاتخلي لينا 250 درهم فاليوم ربح صافي....
8- أكثر حاجة نخاف منها فالمشروع ديالي هو المرض. و لي غانتفاداه بالتلاقيح و النظافة المستمرة و الوقاية. و مانخليش شي حد غيري يدخل للكوري و فأي دخول كاناخذ دوش و نلبس ملابس الكوري الخاصة، و النوافد يكون فيهم سياج كايمنع دخول الطيور البرية حاملة الامراض، و الجدران مصبوغين بالجير و تكون التهوية مزيانة باش ماتجمعش عندي لامونياك. و الا وفرت هاذ الامور غانكون على ثقة تاامة انني غاذي فالطريق الصحيح و المشروع ديالي غاذي للنجاح......
9-ملي كايوجد عندي البيض و وصلت لمرحلة التسويق، كاينين طريقتين للبيع .. الجملة او التقسيط، و كفلاح مبتدا كانفضل التقسيط باش نبيع بثمن مرتفع.. و اكيد الا نقصت شوية باش تسهال عليا عملية البيع فلا باس بذلك. المكان لي غانقصد الا بغيت نبيع بالتقسيط هوا الاسواق .. و الا بغيت نبيع بالجملة خاصني نخلق علاقات مع تجار لي يبداو ياخذو من عندي السلعة من الكوري مباشرة باش نقص عليا مصاريف الشحن...
10 - أما من الناحية القانونية فالامور مبسطة ..
القانون كايقوليك الا كنتي مربي اكثر من 500 طير فضروري لك من رخصة لي نقدرو نوجدوها بسهولة .. اكيد غايشرطو علينا بعض الامور فالكوري و لكنها كلها امور سهلة و غير مكلفة و كاتبقى فصالحنا قبل كل شيء لانها امور كاتعلق بالوقاية .. و بالنسبة ليا كانصح اي شخص بغا يستثمر فالدواجن انه ياسس تعاونية وخا يدير فيها غير افراد عائلتوا باش يستافد من الدعم و يدير ماركة تجارية و يبيع براسو مرفوع و يكون عندو الحق يتعامل مع اسواق و مطاعم كبيرة
و فالختام نبغي نقول لاي واحد باغي يستثمر فالدجاج ..
ما خاب من استشار .. استاشر و سول و بحث و درس حتى تكون على قناعة و تكون جمعتي واحد الكم من المعلومات و عندك الخاطر لهاذ المجال و توكل على الله عز و جل ..
و نسأل الله تعالى ايسر لكل شخص
أمورو و يوفقوا ..
شارك المقال مع الاصدقاء ديالك و أسألكم الدعاء لي جزاكم الله خيرا.
دواجن سليمان
ليست هناك تعليقات:
إرسال تعليق